Kryeministri i Kosovës, Albin Kurti ka folur për protestën që u mbajt të shtunën në Prishtinë kundër rritjes së çmimit të energjisë elektrike.
Kurti ka thënë se sot është dita e fundit për dërgimin e komenteve te Zyra e Rregullatorit të Energjisë kundër apo pro propozimit të tyre për shtrenjtimin e energjisë.
“Besoj që deri në orën 16 sot do të ketë mjaftueshëm komente te Zyra e Rregullatorit të Energjisë, në mënyrë që të gjendet zgjidhja më e mirë e mundshme, në këtë krizë energjetike. Nuk është e mundur që të mos kemi as subvencion, as shtrenjtim e as shkyçje, andaj duhet të jemi sa më shumë bashkëpunëtorë që të dalim së bashku nga kjo situatë. Ne jemi në këtë pozitë jo për fajin tonë, pasi që çmimi i energjisë elektrike është ngritur edhe në bursën ndërkombëtare dhe kemi më shumë se dy dekada që kemi pasur zhvatje në KEK dhe jo vetëm”, tha Kurti.
Ai ka folur edhe për vizitën e Escobar dhe Lajçak në Kosovë, ku ka thënë se do të jetë hera e parë që do të takohet me të dërguarin special për Ballkanin, Gabriel Escobar, pasi me të ka biseduar vetëm me anë të telefonit.