Në Universitetin e Georgetown, ditën e djeshme, kryeministri Edi Rama foli për diçka, për të cilën rrallë e bën: Familjen e tij.
Ai përmendi familjen kur ra puna për të folur për bashkëjetesën fetare në Shqipëri.
Ai foli dhe për veten duke thënë se është një piktor, që nuk pati kurrë shansin të bëhej akademik, edhe pse ka qenë për një kohë pedagog.
“Jam sot këtu në këtë tempull të botës akademike, si një piktor që nuk ka qenë akademik dhe asnjëherë nuk pati shansin të ishte pjesë e kësaj bote, në të njëjtën kohë më bënë të mendoj sesa shumë ai regjim shtypi besimin, të drejtën për të besuar. Sa shumë vuajti i shkaktoi komunitetit katolik vetëm se përfaqëson lidhjen më të drejtë me perëndimin,” u shpreh kryeministri.
Nuk mungoi as një fjalë për qeverinë në të cilën ka rritur numrin e grave në qeverisje.
“Zgjedhja për të pasur një qeveri me më shumë gra sesa burra nuk është për faktin se unë jam një njeri demokratik, por kam kuptuar se gratë janë më të mirë sesa burrat dhe e bëjnë punën më mirë. Na duhen më shumë gra, sepse burrat janë të mirë për të folur, ndërsa gratë janë të mira për të bërë gjërat. Këtë e kam dëgjuar nga përvoja”, tha Rama.