Miliarderi ruso-izraelit Roman Abramovich, me kërkesë të Ukrainës, ndodhet në Bjellorusi për të ndihmuar në negociatat mes Rusisë dhe Ukrainës, si pjesë e një përpjekjeje për t’i dhënë fund luftës në vazhdim, ka mësuar The Jerusalem Post. Abramovich-it iu kërkua nga ukrainasit që të ndihmonte në mundësimin e bisedimeve dhe ka udhëtuar në Bjellorusi për të marrë pjesë në diskutime.
Delegacionet nga Rusia dhe Ukraina mbërritën në qytetin kufitar të Bjellorusisë, Gomel, të dielën dhe filluan bisedimet që synonin të gjenin një mënyrë për t’i dhënë fund luftimeve në Ukrainë. Abramovich ka lidhje të ngushta me komunitetet hebreje në Ukrainë dhe Rusi.
Ambasadori i Ukrainës në Izrael, Yevgen Kornichuk nuk komentoi në mënyrë specifike për përfshirjen e Abramovich në bisedime, por tha se “ne vlerësojmë këdo që mund të ndihmojë, nëse ai ka mjaft ndikim”.
RELATED STORIES
Kujtojmë se Abramovich, pronari i Klubit të Futbollit Chelsea, është vënë nën kritika në Londër për raportet për marrëdhënien e tij të kaluar me presidentin rus Vladimir Putin.
Në parlament janë shtuar thirrjet që ai të sanksionohet. Të dielën, ai vendosi t’ua dorëzojë “administrimin” e Chelseat administratorëve të fondacionit bamirës të klubit.