Agron Duka identifikon tre nga gjashtë bashkitë ku do ta mbahen zgjedhjet e pjesshme vendore, ku opozita ka shanse reale për të fituar në zgjedhjet e 6 marsit.
“Shkodra, Durrësi dhe Rrogozhina mund të fitojmë, në një nga këto bashkitë. Kam informacione që ka aleanca në favor të opozitës në këto bashki”, deklaroi ai i ftur në Politiko në Top News këtë të hënë.
Sipas kreut të PR-së, Fatmir Mediu, Edi Rama ndryshe nga sa ka deklaruar në daljet publike nuk do të tolerojë në këto zgjedhje.
“Rama nuk do të tolerojë në këto zgjedhje, sepse ose do që të ruajë votat e 25 prillit, ose do që t’i shtojë ato për të mos konfirmuar akuzat për manipulim të raportit të OSBE”, tha ai.
Edhe Dashamir Shehi mendon se Rama nuk do të lëshojë pe në këto zgjedhje.
“Nuk lëshon Rama pushtet. E shikoni çfarë po ndodh në Federatën e Futbollit? Ky nuk pranon që të ketë institucione qoftë edhe formalisht të pavarura. Rama nuk do të lëshojë pe”, deklaroi ai.