Gjykata e Posaçme kundër Korrupsionit dhe Krimit të Organizuar ka dhënë këtë të martë dënimin për 10 të pandehurit e dosjes së laboratorit të kokainës të zbuluar në fshatin Frakull të Fierit, të cilët akuzohen për trafikimin e 485 kg lënde narkotike të fshehur në plehun kimik.
Të pandehurit janë shpallur fajtor për trafik narkotikësh, armëmbajtje pa leje e grup kriminal, duke u dënuar në total me mbi 90 vite burgim, teksa kanë përfituar uljen e 1/3 së dënimit për shkak të gjykimit të shkurtuar.
Në këtë grup kriminal ishte i përfshirë ish-kreu i komunës Frakull, Viktor Çervanaku (deri në 2021 i punësuar si drejtor pranë OST) si dhe familjarët, si i biri, i vëllai dhe e dashura e djalit të tij.
Laboratori i drogës u zbulua në nëntor të vitit 2022 gjatë një operacioni ku morën pjesë DEA, SPAK dhe policia malazeze. Operacioni çoi në zbulimin e rreth 430 kg kokainë, të fshehur në 20 paleta me 24 ton pleh artificial, që janë porositur në Kolumbi nga Zenel Çervanaku dhe kanë zbarkuar fillimisht në portin e Tivarit, në Mal të Zi.
Droga u pikas fillimisht nga autoritetet malazeze me sinjalizim të DEA-s amerikane ndërsa për ekstraktimin e lëndës narkotike grupi kriminal kishte kontraktuar 2 kimist kolumbian.
Për këtë rast SPAK ka veçuar edhe një fraksion tjetër hetimor për persona të tjerë të paidentifikuar që dyshohet se kanë qenë të përfshirë në trafikun e kokainës nga Kolumbia mes tyre edhe një individ i thirrur me nofkën “Mirditori”.
DËNIMET:
Nikolin Gjolena – 17 vite – 11.4 me gjykim të shkurtuar
Viktor Cervanaku – 15 vite – 10 me gjykim të shkurtuar
Enxhi Ferhati – 12 vite – 8 me gjykim të shkurtuar
Klajdi Kodra – 17 vite – 11.4 me gjykim të shkurtuar
Bledar Matoshi – 12 vite – 8 me gjykim të shkurtuar
Denilson Çervanaku – 17 vite – 11.4 me gjykim të shkurtuar
Zenel Çervanaku – 14 vite – 9.4 me gjykim të shkurtuar
Redion Meshi – 14 vite – 9.4 me gjykim të shkurtuar
Julian Malaj – 3 vite – 2 vite me gjykim të shkurtuar për ( moskallëzim krimi ) lirohet menjëherë
Marildo Rona – 12 vite – 8 me gjykim të shkurtuar