Dy të vrarë dhe 3 të plagosur është bilanci i të shtënave me armë zjarri në një lokal me pronarë shqiptarë në Saint-Galles të Brukselit.
Ngjarja mendohet se lidhet me trafikun e drogës. Sulmi me armë ka ndodhur midis orës 01:00 dhe 02:00 pas mesnate në një kafene në “Rue de l’Argonne”, jo shumë larg Gare du Midi.
Autorët e të shtënave mësohet se kanë qëlluar me kallashnikovë, ndërsa plumbat kanë goditur klientët që ndodheshin në tarracën e lokalit.
RELATED STORIES
Dy persona u vranë dhe tre u plagosën. Njëri nga të plagosurit ndodhet në gjendje të letë, ndërsa dy të tjerët në gjendje më të rëndë.
Sipas një burimi të mirëinformuar, autorët kanë udhëtuar me një skuter. Elementet e para të hetimit do të tregonin se ata kishin në shënjestër kafenenë dhe jo klientë të veçantë. Dy personat e vrarë dyshohet se ishin viktima aksidentale.
Ata janë një burrë dhe një grua. Nuk dihen ende motivet e këtij sulmi, megjithëse ka dyshime se është e lidhur me drogën. Gjithashtu dyshohet se objektiv i atentatit mund të kenë qenë pronarët shqiptarë të kafenesë.
Numri i lartë i viktimave e bën atë një nga atentatet më vdekjeprurëse të viteve të fundit në Bruksel.
Brukseli, dhe veçanërisht distrikti Gare du Midi, ka qenë prej kohësh i rrënuar nga dhuna e lidhur me trafikun e drogës. Në vitin 2023, dhuna e lidhur me drogën la 7 të vdekur, ndërsa 130 persona të tjerë u plagosën rëndë.
Shumë shpesh, ajo përfshin dhunën midis bandave rivale që konkurrojnë për territor për të shitur drogë.
