Ministrja e Jashtme e Kosovës, Donika Gërvalla nga Tirana deklaroi qartë dhe pastër se Prishtina nuk ka nevojë për konferencë paqeje, që propozon Edi Rama. Ajo tha se Kosova nuk është objekt, por subjekt.
“Konferencat e paqes janë zhvilluar gjatë luftërave në Ballkan, edhe atëherë nuk kanë sjellë normalizimin. Nuk ka nevojë. Kosova nuk është objekt, por subjekt” tha ajo.
Kishte një “shuplakë” të fortë indirekte për Ramën kur foli për “Open Balkan”. “Serbia ka luftuar për të pasur “Open Balkan”, që njëherë u bashkëngjitën edhe të tjerë, por tani ka mbetur vetëm. Ai ka qenë një “kalë troje”, i destinuar që të prishë nga brenda idenë e bashkëpunimit rajonal që udhëhiqet nga Gjermania” tha ajo.
RELATED STORIES
E pyetur në lidhje me negociatorët pas akuzave kundër Miroslav Lajçakut, Gërvalla u shpreh se “ne nuk kemi aktorë të preferuar, por besimi ka humbur goxha me ndërmjetësuesin e tanishëm, pasi procesi ka treguar se është i njëanshëm, por nuk jemi ne ata që duhet t’i tregojmë BE-së çfarë duhet të mbajë ose jo.
Në këtë proces kërkojmë që të merren parasysh interesat e dy palëve. Ne jemi të ndërgjegjshëm që Kosova nuk mund të marrë 100% të kërkesave të saj, por procesi duhet të jetë i drejtë, pasi vetëm atëherë krijon mundësi për zgjidhje të mira” tha ajo.
Më tej, ajo theksoi se për momentin nuk mund të flitet për dialog apo asociacionin. Kërkoi që më parë të ndëshkohet Serbia për sulmin në Banjskë. “Ti ngrihet statusi i vendit kandidat për integrimin në BE” tha Gërvalla. Në fund u pyet për bisedën me ministren e Jashtme gjermane, por nuk ndau detaje për mediat.