Lideri i “Lëvizjes për mbrojtjen e Kosovës”, Nebojsha Joviç është tërhequr nga politika pasi është kërcënuar me vdekje. Ai së bashku me familjen e tij ka disa ditë që nuk janë parë më në vendin e tyre të lindjes, në veri të Mitrovicës, ndërsa për vendndodhjen e tyre nuk di askush.
Burime të KosovaPress-it bënë të ditur se më 14 qershor në orët e vona të natës, 6 persona të armatosur dhe me maska, kanë hyrë me forcë në banesën e Nebojsha Joviçit që ndodhet në rrugën “Knjaz Milos” në veri të Mitrovicës, që dyshohet se synim kanë pasur vrasjen e tij, mirëpo përveç bashkëshortes dhe dy fëmijëve, ai nuk është gjetur aty.
Sipas këtyre burimeve, atij edhe në të kaluarën i është tërhequr vërejtja disa herë që ta ndërpresë aktivitetin e tij politik, por që ai nuk është ndalur. KosovaPress-i ka provuar për disa ditë me radhë të kontaktojë me Nebojsha Joviç, por pa sukses, ndërsa telefoni i tij vazhdimisht nuk është i arritshëm
RELATED STORIES
Zëvendësdrejtori i Policisë së Kosovës në Mitrovicë, Veton Elshani bëri të ditur se policia nuk është në dijeni për rastin.
“Policia nuk ka informacion dhe askush nga qytetarët deri tani nuk ka raportuar një rast të tillë në polici”, u shpreh Elshani.
Nebojsha Joviç ka qenë ndër bashkëpunëtorët më të ngushtë të politikanit të vrarë serb, Oliver Ivanoviç, ndërsa kohët e fundit në paraqitjet e tij të shumta publike, ka deklaruar se “Lista serbe ka humbur kredibilitetin dhe se nuk mund ta përfaqësojë më popullin serb të Kosovës”.
Po ashtu, ai ka udhëhequr protestën e 13 qershorit në veri të Mitrovicës kundër arrestimit të Millun Milenkoviç – “Llune” nga ana e Policisë së Kosovës/ KosovaPress