Prokuroria Speciale e Kosovës ka arrestuar ditën e sotme një person me inicialet N.S., nën akuzën “Dhuna ndaj përfaqësuesve të lartë të Republikës së Kosovës”.
Sipas njoftimit, ai ka kanosur me vrasje kryeministrin e Kosovës, Albin Kurtin pasi që ka bërë një postim në rrjetin social “Facebook” me përmbajtje të papërshtatshme.
Po ashtu, mësohet se atë deklaratë ai e ka përsëritur gjatë një transmetimi televiziv të drejtpërdrejtë.
RELATED STORIES
“Me aktvendim të Prokurorisë Speciale i njëjti është ndaluar për 48 orë,” thuhet në njoftimin për media.
“Me urdhër të Prokurorisë Speciale të Republikës së Kosovës, Policia e Kosovës, ka arrestuar sot të dyshuarin me inicialet N.S. për shkak të dyshimit të arsyeshëm se ka kryer veprën penale “Dhuna ndaj përfaqësuesve të lartë të Republikës së Kosovës’’ nga neni 121 të KPRK-së.
Prokuroria Speciale njofton se i dyshuari N.S., ka bërë kanosje të dhunës për vrasje ndaj Kryeministrit të Republikës së Kosovës, pasi që ka bërë një postim në rrjetin social “Facebook’’ me përmbajtje inkriminuese, si dhe gjatë transmetimit të drejtpërdrejtë të emisionit “DEBAT PLUS’’, të datës 30 gusht 2023, të njëjtën deklaratë i njëjti e përsëritë,” thuhet në njoftimin zyrtarë.