Është liruar kryetari i Partisë Socialdemokrate, Dardan Molliqaj dhe disa aktivistë të tjerë të cilët u arrestuan në protestën e kësaj parite që patën të martën brenda objektit të ZRRE-së.
Molliqaj nëpërmjet një shkrimi në “Facebook” ka shkruar se Nol Nushi e Genc Sherifi nuk janë liruar, dhe se kjo sipas tij është një farsë gjyqësore pa asnjë kuptim ligjor.
Postimi i plotë:
PËRBALLË SKANDALEVE E VENDIMEVE TË PADREJTA, PUSHTETI DON DISIPLINË
Ndaj një proteste paqësore që synim kishte zbardhjen e mashtrimit për rritjen e çmimit të energjisë, pushteti përdori policinë.
Ndaj protestuesve që u nxorrën me dhunë, pushteti urdhëroi mbajtje 48 orëshe pa ekzistuar asnjë rrethanë ligjore për një vendim të tillë.
Pyetjeve tona se sa është rritur çmimi i rrymës e sa fiton KEDS-i në krejt këtë krizë, pushteti iu përgjigj me dhunë e diciplinë.
Vendimeve të padrejta dhe thellimit të pabarazisë, Qeveria Kurti po i përgjigjet në mënyrën më tipike për pushtetet me mendësi autoritare: dhunë e disiplinim.
Pas 48 orësh izolim, u liruam të gjithë. Pa ndërruar asnjë rrethanë. Ndërkohë që prokuroria po mban ende nën arrest Nol Nushin dhe Genc Sherifin, në një farsë gjyqësore pa asnjë kuptim ligjor.